Deschamps lavdëron kuqezinjtë

Franca është kualifikuar në rreth tjetër, ndërsa ndeshjet e fundit në fazën e grupeve do ta ketë ndaj Zvicrës

Trajneri i Francës, Didier Deschamps, ka qenë shumë i lehtësuar pas përfundimit të ndeshjes, ku mori tri pikët që i duheshin për të siguruar kualifikimin në fazën tjetër të turneut, shkruan albinfo.ch.

“Ishte e vështirë, pasi Shqipëria luan me zemër. Rezultati 0:0 ishte shumë i mirë për ta. Është e vështirë ndaj kundërshtarëve të tillë. Mos harroni që edhe lojtarët e Shqipërisë luajnë në klube të mira”, tha ai, duke shtuar:

“E di që nuk kemi bërë gjithçka mirë, por dalim me tre pikë nga ky duel. Pjesa e dytë ishte e një niveli të mirë dhe ne bëmë gjithçka për t’i nxjerrë nga pozicionet kundërshtarët dhe nuk i lejuam të na rrezikonin më”, theksoi trajneri francez.

Franca siguroi kualifikimin tutje, derisa në ndeshjen e fundit do të ballafaqohet me Zvicrën, kurse Shqipëria me Rumaninë.