Shqipëria nuk i frikësohet Italisë

Futbollistët kuqezi janë shprehur se respektojnë Italinë, por do të hynë për të marrë pikë. Ata presin edhe përkrahjen e tifozëve kuqezi

Një ndeshje shumë e rëndësishme, por edhe e vështirë për Kombëtaren shqiptare, që më 24 mars është mysafire e Italisë, shkruan albinfo.ch.

Megjithatë, futbollistët kuqezi janë shprehur se respektojnë “Azzurrët”, por nuk hynë të frikësuar për këtë ndeshje.

Migjen Basha e njeh më së miri trajnerin e Italisë, Giampiero Ventura, pasi ka qenë nën urdhrat e tij te Torino. Basha ka thënë se i ka treguar De Biasit për sistemin që aplikon Ventura.

Përkundër se ndeshja do të zhvillohet në Palermo ai pret mbështetjen e tifozëve kuqezi. “Nëse ndeshja do të ishte në Milano padyshim që do të kishte më tepër tifozë, megjithatë mbështetja për Kombëtaren nuk ka munguar asnjëherë dhe do t’i kemi tifozët tanë. Nuk besoj që trajneri bazohet te fakti se lojtarët që luajnë në Itali duhet të jenë në fushë. Fillimisht duhet parë forma e futbollistëve dhe taktika është në plan të dytë. Forma është shumë e rëndësishme për të vendosur aty ku bazohet trajneri për taktikën e së premtes”, ka theksuar Basha.

Edhe Ledian Memushaj që luan në Itali thotë se do të japin maksimumin në fushë. “Do të japim maksimumin dhe do të kërkojmë të marrim pikë. Kur luan me ekipe të mëdha nuk ka nevojë për motivim. Është një ndeshje shumë e rëndësishme dhe këtë e kemi të qartë. Do të kërkojmë të marrim pikë”, është shprehur kapiteni i Pescara-s.