Shqipëria, shpenzimet më të larta për ushqime në Evropë

Foto ilustrim

Shqipëria është vendi që harxhon më shumë për t’u ushqyer në krahasim me atë që prodhon ekonomia e vendit për një vit. Sipas të dhënave të publikuara në tabelat e Eurostat, Shqipëria shpenzoi 32.4% të Prodhimit të Brendshëm Bruto (PBB) në vitin 2016 për ushqime, përcjell albinfo.ch.

Sipas Monitor, pas Shqipërisë renditet Kosova, me 29.4% të PBB-së, e ndjekur nga Mali i Zi me 22.8%, Bosnja me 21.5%, Maqedonia me 18.4%, Serbia me​16.5%.
Vetëm për bukë dhe drithëra Shqipëria shpenzon 5% të asaj që prodhon ekonomia në një vit, sërish më e larta në Evropë, nga 1.1% që është mesatarja e BE-së dhe 3.7% që është vendi i dytë pas nesh (Mali i Zi).

Të dhënat e Eurostat tregojnë se mesatarja e shpenzimeve të Bashkimit Evropian për ushqime është vetëm 6% e PBB-së (pothuajse aq sa shqiptarët shpenzojnë vetëm për bukë), ku më e ulëta është në Luksemburg dhe Irlandë, përkatësisht me 2.8 dhe 2.6% të PBB-së (shih grafikun e parë).

Në vlerë absolute, shpenzimet mesatare për banor për ushqime në Shqipëri ishin 1,208 euro në vit, më të lartat në rajon, sipas Eurostat. Vendet e zhvilluara shpenzojnë më shumë për frymë për ushqime në vlerë absolute, pasi është më i shtrenjtë (mesatarja e BE-së është 1,764 euro), por për shkak të të ardhurave të larta, kjo nuk rëndon në xhepat e tyre.

Po sipas Eurostat, rezulton që Shqipëria ka bërë hapa pas vitet e fundit, teksa shpenzimet për ushqime janë rritur në vite, nga 28.2% e PBB-së në 2007-n, në 32.4% në 2016-n.

Janë pikërisht të ardhurat e ulëta ato që bëjnë që konsumatorët shqiptarë të shpenzojnë më shumë për ushqim e pije joalkoolike, dhe më pas të mendojnë për shëndetin, energjinë, argëtimin, veshjen, ngrohjen, etj.

Po sipas Eurostat, Shqipëria renditet një nga vendet e fundit në Evropë për sa u përket të ardhurave për frymë, që në 2016-n u ul në 29% të mesatares së BE-së, e fundit në rajon.