Lajme

Shqiptarët e Luginës kërkojnë bashkimin me Kosovën

“Duhet të bashkohemi me Kosovë dhe kjo është e vetmja zgjidhje", thonë liderët shqiptarë të Luginës

Dialogu mes Serbisë dhe Kosovës do të rifillojë dhe kryetari i Partisë Demokratike Shqiptare, Ragmi Mustafa, tregon në Balkan Talks në Euronews Albania se ata kërkojnë bashkimin me Kosovën.

“Dialogu tani është në pikën e vazhdimit të bisedimeve dhe Lugina e Preshevës pret t’i bashkëngjitet Kosovës. Është e drejtë jona të kthehemi në trungun tonë. Përderisa Beogradi nuk interesohet për ne, atëherë ne do ndiheshim më të lirë të jemi pjesë e Kosovës”, u shpreh ai, përcjell Albinfo.ch.

Sipas Mustafës, kërkesa e Vuçiq për të drejtat e serbëve në Kosovë vjen sepse do të krijojë një mini-shtet serb në Kosovë.

“Serbia po përpiqet të arrijë një shkallë më të gjerë për të drejtat e serbëve në Kosovë, duke krijuar një mini-shtet serb në Kosovë. Ai do territore që janë të populluar nga serbë, por do jetë e kotë”, theksoi Mustafa.

Në fund të emisionit kryetari i Partisë Demokratike Shqiptare, Ragmi Mustafa, bën thirrje që të kthehen sytë nga Presheva, Bujanovci dhe Medvegja, pasi mund të ndodhë e njëjta gjë si me Çamërinë.

“Duhet të bashkohemi me Kosovë dhe kjo është e vetmja zgjidhje. Shqiptarët në këto territore po lënë pronat nga diskriminimi dhe nëse vazhdon kështu dhe me pasivizimin e adresave, do të ndodhë njësoj si me Çamërinë”, shton Mustafa.

 


LAJME INTERESANTE NGA INTERNETI