Shqiptarët punojnë më shumë e paguhen më pak

Të dhënat e INSTAT tregojnë se shqiptarët punojnë më gjatë se të gjithë në Evropë

Në Bashkimin Evropian, në vitin 2023, personat e aftë për punë, të moshës 20–64 vjeç, punonin mesatarisht 36.1 orë në javë, sipas Eurostat. Ky numër i referohet orëve që njerëzit kanë punuar realisht në punën e tyre kryesore gjatë javës së referencës.

Orari mesatar i punës në javë ndryshon ndërmjet vendeve të BE-së. Javën më të gjatë të punës e kanë Greqia (39.8 orë), Rumania (39.5), Polonia (39.3) dhe Bullgaria (39.0). Në të kundërt, Holanda kishte javën më të shkurtër (32.2 orë), e ndjekur nga Austria (33.6) dhe Gjermania (34.0), shkruan Monitor, transmeton albinfo.ch.

Të dhënat e INSTAT tregojnë se shqiptarët punojnë më gjatë se të gjithë në Evropë. Për vitin 2023, të punësuarit me pagë punonin mesatarisht 43.7 orë në javë, ose 7.6 orë më shumë se mesatarja evropiane. Orët më të gjata janë në prodhim (46.5), bujqësi (44.8) e ndërtim (45.6), dhe më të ulëta në administratë (40).

Pas Shqipërisë renditet Turqia me 43.1 orë. Ballkani përgjithësisht punon më gjatë: në Mal të Zi punonjësit janë në punë 42.8 orë në javë, në Serbi 41.3, në Bosnjë 41.2 dhe në Maqedoninë e Veriut gati 40 orë. Ndonëse shqiptarët rrinë më gjatë në punë, ata paguhen më pak se të gjithë, pasi paga minimale dhe ajo mesatare janë më të ulëta në rajon (nuk ka të dhëna për Kosovën).

Në BE, në vitin 2023, 37.1 % e të punësuarve punonin mesatarisht ndërmjet 40 dhe 44.5 orë në javë, ndërsa vetëm 7.1 % regjistronin më pak se 20 orë punë në javë në punën kryesore. Diapazoni 40–44.5 orë përfaqëson pjesën më të madhe të të punësuarve në shumicën e vendeve – me përjashtim të Irlandës, Finlandës, Belgjikës, Francës dhe Danimarkës, ku pjesa më e madhe e të punësuarve ishte në intervalin 35–39.5 orë mesatare pune në javë.

Po i njëjti interval (40–44.5 orë) tregon edhe dallimet më të mëdha midis vendeve: përqindjet më të larta u regjistruan në Bullgari (82.2 %), Rumani (80.2 %) dhe Letoni (77.7 %), ndërsa më të ulëta në Belgjikë (16.1 %), Francë (13.3 %) dhe Danimarkë (10.6 %).

---