Shqiptarja emërohet në nivelin më të lartë të administratës amerikane

Dikur emigrante, sot mban postin e ndihmës-sekretares në Departamentin e Sigurisë së Brendshme në SHBA.

Shqiptarja Eva Milliona është emëruar ndihmës-sekretare në Departamentin e Sigurisë së Brendshme në SHBA.

Është posti më i lartë që e ka mbajtur ndonjëherë në administratën amerikane një shtetas shqiptar, i lindur në Shqipëri, raporton gazeta “Tema”, përcjell Albinfo.ch.

Milliona ka studiuar drejtësi në Universitetin e Tiranës në vitet 1980-ta dhe ka shënuar një bilanc të madh arritjes në karrierën e saj.

Në Shqipëri, ajo ka praktikuar të drejtën civile dhe penale para se të bëhej gjyqtarja më e re e rrethit e emëruar ndonjëherë në Gjykatën e Rrethit të Tiranës. Shërbeu nga viti 1989 deri më 1992.

Pasi emigroi në SHBA, ajo drejtoi programin e rivendosjes së refugjatëve në Massachusetts Qendror dhe më pas në vitin 1999 u bashkua me MIRA (Massachusetts Immigrant and Refugee Advocacy Coalition), duke shërbyer fillimisht si drejtoreshë e politikave dhe avokatisë e më pas si zëvendësdrejtoreshë.

Ka marrë çmime të shumta për avokatinë e për udhëheqjen, përfshirë çmimin prestigjioz Outsanding American by Choice në vitin 2009 nga Shërbimet e Shtetësisë dhe Imigracionit të SHBA-së dhe Çmimin e Drejtësisë Sociale të Bankës Wainwright në vitin 2010./Albinfo.ch/

---