Shtohet numri i azilkërkuesve që lëshojnë Zvicrën

Vendimi i BFM për shkurtimin në vetëm 48 orë të procedurës së instancës së parë të azilit ka bërë që numri i të kthyerve të jetë kaq i madh

Numri i kërkuesve të azilit në Zvicër gjatë muajve korrik, gusht e shtator kishte shënuar një rritje në krahasim me kuartalin paraprak, duke arritur shifrën prej 7830 sish. Por, nga ana tjetër, duke filluar nga shtatori është rritur dukshëm numri i azilkërkuesve që lëshojnë Zvicrën. Kjo rritje shpjegohet me fillimin e veprimit të procedurës së shkurtuar, që ka filluar më 21 gusht, konstaton Zyra Federale për Migracion (BFM).

Romët nga Serbia, Maqedonia dhe Bosnjë e Hercegovina ishin ata që e kishin shkaktuar rritjen e numrit të kërkesave të azilit gjatë muajve të përmendur. Por ka qenë pikërisht kthimi i tyre gjatë muajit shtator ai që ka shkaktuar rënien e numrit të përgjithshëm të azilkërkuesve. Sepse, gjatë shtatorit është shënuar një zvogëlim i këtij prej 19 % në krahasim me muajin gusht.

Vendimi i BFM për shkurtimin në vetëm 48 orë të procedurës së instancës së parë të azilit ka bërë që numri i të kthyerve të jetë kaq i madh. Kjo vlen për azilkërkuesit që vijnë nga shtetet që nuk kanë nevojë për vizë për të hyrë në Zvicër dhe në këtë grup bëjnë pjesë edhe vendet e përmendura të Ballkanit. Vlen të theksohet po ashtu se nga prilli e tutje nuk jepen më para për kthim dhe as pagesa e rrugës prej 100 frangash.

Në muajin gusht në Zvicër kishin kërkuar azil 765 shteas të Serbisë, Bosnjës e Maqedonisë, ndërsa në shtator vetëm 327 sish. Megjithë rezultatin pozitiv të treguar, BFM nuk është e sigurt nëse shkurtimi i procedurës do të ketë efekt afatgjatë.

BFM po ashtu ka arritur rezultate sa i takon rritjes së numrit të të kthyerve, vullnetarë dhe me detyrim. Gjatë kuartalit të tretë të këtij viti, Zvicrën e kanë lëshuar, nën mbikëqyrjen e autoriteteve, 3725 të huaj, që është numër 50 për qind më i madh se në periudhën e njëjtë një vit më parë. Ndërkaq 1780 persona, ose dyfish më shumë se vitin e kaluar, kanë lëshuar Zvicrën me iniciativë të tyre.