Shuhet ikona e filmit kosovar, Hadi Shehu

Përfaqësuesit e Institucioneve të Kosovës kanë shprehur ngushëllime, ndërsa e konsiderojnë si humbje të madhe vdekjen e ikonës kosovare të filmit, Hadi Shehu. Ai luajti në filmat: "Gjurmë të bardha" ,“Kur pranvera vonohet", "Era dhe lisi"

Në moshën 68 vjeçare është shuar nga jeta aktori i madh i teatrit dhe filmit kosovar, Hadi Shehu. I lindur në Gjakovë më 15 shkurt 1949, Shehu ka lënë pas një karrierë të pasur të aktorit profesionist, shumë filma të metrazhit të gjatë, drama e skena teatrale, ndërsa vdekja e tij ka lënë një boshllëk në botën e artit kosovar.

Përfaqësuesit e Institucioneve të Kosovës kanë shprehur ngushëllime, ndërsa e konsiderojnë si humbje të madhe vdekjen e ikonës kosovare të filmit.

“Me pikëllim morëm lajmin për ndarjen nga jeta e të dashurit tuaj dhe aktorit tonë të mirënjohur, Hadi Shehut. Ndarja nga jeta e aktorit Shehu është humbje e madhe për familjen, miqtë, artin dhe kulturën shqiptare, për teatrin dhe filmin e Kosovës, ku Hadiu kontribuoi me devotshmëri dhe la gjurmë të pashlyeshme”, shkruan në ngushëllimin e tij ministri i Kulturës, Rinisë dhe Sportit, Kujtim Shala.

Sipas tij, Hadi Shehun dhe puna e tij e palodhshme, janë trashëgimi e vlefshme për artin dhe kulturën e tonë, andaj edhe kujtimi për të do të jetë i përhershëm.

Kryetarja e Komunës së Gjakovës, Mimoza Kusari-Lila, ka shprehur ngushëllimet e saja për vdekjen e aktorit Hadi Shehu.

“Prehu në paqe Hadi Shehu, ikona e Teatrit dhe biri i Gjakovës, aktori i kombit. U rritëm me frymëzimin e jetësimit tënd të burrave të kombit si, Sulejman Vokshin, Bajram Curri, Betim Kosovën e shumë të tjerë, ndërsa sot në mëngjes u rreshtove krahas tyre në botën e përjetësisë”, shkruan në ngushëllim Kusari-Lila.

Emri dhe kontributi i Hadi Shehut, sipas saj, do të mbesin gjithmonë në botën “tonë mbuluar nga nderi, lavdi dhe krenaria për gjithçka që ai ka dhënë për vendin dhe popullin e vet”.

Edhe presidenti i Kosovës, Hashim Thaci i ka shprehur ngushëllime familjes Shehu, duke thënë se me veprimtarinë e tij krijuese dhe artistike, Hadi Shehu ishte një pasuri e madhe e artit shqiptar në përgjithësi.

“Me pikëllim mora lajmin për vdekjen e aktorit të madh, Hadi Shehu. Ngushëllime familjes Shehu dhe gjithë komunitetit artistik në Kosovë”, ka shkruar ai në facebook.

Për kryeministrin e Kosovës, Isa Mustafa, Hadi Shehu ishte një artist i madh i skenës kosovare, humbja e të cilit do të lerë zbrazësi të madhe për familjen, për miqtë, për teatrin dhe filmin, si dhe për jetën artistike e kulturore të Kosovës në përgjithësi.

“Hadi Shehu do të përkujtohet gjithnjë për pasurinë e madhe artistike që i ka lënë Kosovës, gjatë punës së tij prej disa dekadash”, thotë Mustafa.

Hadi Shehu ishte themelues i Teatrit Profesionist në Gjakovë dhe njëherë dhe drejtor i këtij teatri deri në vitin 2007. Diplomoi në Shkollën e Lartë Pedagogjike në Prishtinë, më 1974, në degën e artit dramatik, klasa e Faruk Begollit. Në skenën e Teatrit të Gjakovës ka realizuar me qindra role të paharruara dhe të mahnitshme në drama të ndryshme: “Fisheku në pajë”, “Njeriu me top”, “Epoka para Gjyqit”, “Monserati”, “Kur shpirti ndërron jetë”…

Ka luajt në role kryesore në dhjetëra filma artistik, më të njohurit janë: “Gjurmë të bardha” ,“Kur pranvera vonohet”, “Era dhe lisi”. Po ashtë së fundi ka luajtur edhe në shumë drama, përfshirë edhe atë “Oda e Junikut”…