Shumica e zviceranëve janë në favor të arritjes së një kompromisi me BE-në

Keystone

Marrëdhëniet midis Zvicrës dhe Bashkimit Evropian janë acaruar që nga maji 2021, kur zviceranët përfunduan papritur negociatat për marrëveshjet kuadër me bllokun, transmeton albinfo.ch.

Megjithatë, sipas një sondazhi të ri nga instituti i kërkimit të tregut gfs.bern, 80 për qind e popullsisë së Zvicrës është gati të bëjë disa lëshime, siç është miratimi i ligjit evropian, për sa kohë që nuk preket e drejta e referendumit.

Në mënyrë të ngjashme, 67 për qind e të anketuarve thanë se janë të hapur për të pranuar panelin special të arbitrazhit për të zgjidhur mosmarrëveshjet Zvicër-BE dhe për të paraqitur ankesa në Gjykatën Evropiane të Drejtësisë, e cila ka qenë prej kohësh një çështje e diskutueshme në Zvicër.

“Për një shumicë të popullsisë, çështja e rekursit tek gjyqtarët europianë nuk konsiderohet si një pengesë e pakapërcyeshme në marrëdhëniet me BE-në”, sipas Urs Bieri, bashkëdrejtor i gfs.bern.