Sonte, dueli Krasniqi – Doberstein

Krasniqi që tani renditet i pesti në kategorinë super të mesme ka 45 fitore dhe katër humbje, ndërsa “Dobermani” ka 20 fitore 2 humbje dhe 1 barazim

Boksieri shqiptar Haxhi Robin Krasniqi dhe Jurgen Doberstein, do të ndeshen sonte nga ora 19:00, derisa në matjet zyrtare nuk munguan as tensionet ndërmjet këtyre dy boksierëve, shkruan albinfo.ch.

Pas peshimit të 29-vjeçarit, ishte radha e rivalit të tij nga Kazakistani që garon në flamurin gjerman. Por, ndërsa Krasniqi dukej i qeshur, situata ndryshoi kur dy boksierët u vendosën përballë. Kundërshtari provoi ta provokonte boksierin shqiptar, që nuk u tërhoq nga sfida, ndërsa Doberstein e shtyu.

Pas këtij veprimi, ishte e nevojshme ndërhyrja e personelit të sigurisë dhe e stafit të dy boksierëve, pasi dueli rrezikoi të niste përpara kohe dhe jo në ring. Pavarësisht asaj që ndodhi, Haxhi Krasniqi nuk harroi të realizonte simbolin e shqiponjës në momentin e thirrjes së emrit të tij, ndërsa dy boksierët u vendosën sërish përballë, duke u sfiduar me shikim.

“Jurgen Doberstein është puna ime të premten dhe e dimë si ta mposhtim. Kam ushtruar në Amerikë dhe Kanada edhe para sparingut, në bjeshkët e Bavarisë me trajnerin Sepp Maurer. Jam gati në peshë dhe një “Doberman” (nofka e Dobersteinit) nuk mund të më ndalë në rrugën time drejt titullit të botës”, ka thënë Krasniqi, ndërsa “Dobermani” ka deklaruar e dëshiron titullin me çdo kusht dhe synon vetëm fitoren ndaj Robin Krasniqit.

Krasniqi që tani renditet i pesti në kategorinë super të mesme ka 45 fitore dhe katër humbje, ndërsa “Dobermani” ka 20 fitore 2 humbje dhe 1 barazim.