Specat dhe hudhrat nga Shqipëria, në COOP të Zvicrës

Shefi i COOP-it, Wyss: "Në Shqipëri ka shumë ujë, tokë pjellore dhe shumë njerëz që kërkojnë punë. Specat dhe hudhrat nga Shqipëria janë tashmë në dyqanet tona"

Kompania Coop, e organizuar si kooperativë, është njëra nga dy kompanitë më të mëdha (krahas ose pas Migros-it) të shitjes me pakicë dhe shumicë në Zvicër. Si kooperativë ajo ka rreth 2.6 milionë anëtarë.

Coop-i ka shënuar rritje edhe gjatë vitit 2024, është bërë e ditur nga kompania, transmeton albinfo.ch. Shefi i Coop-it Philipp Wyss bën një bilanc në emisionin e  transmetuesit publik të Zvicrës, SRF  “Tagesgespräch” dhe shpjegon arsyen e entuziazmit që ka për frekuentimin e klientëve dhe shitjet në dyqane që vazhdojnë të jenë shumë më të larta sesa ato online.

Ai thotë se ndër të gjitha prodhimet që shiten në COOP, vendi e parë, të pakontestueshëm e ka Bananja!

Veç kësaj Wyss flet edhe për arsyen përse Coop-i tani po importon perime nga Shqipëria.

Pyetja e gazetarit: “Për shkak të konsumit të lartë të ujit në Spanjë (prej nga vinë tradicionalisht perimet në COOP), ju po kërkoni alternativa dhe tani po shtoni në gamën e artikujve tuaj me perime dhe fruta nga Shqipëria. Pse pikërisht Shqipëria?

“Sepse atje (në Shqipëri) ka shumë ujë, tokë pjellore dhe shumë njerëz që kërkojnë punë. Specat dhe hudhrat nga Shqipëria janë tashmë në dyqanet tona. Megjithatë, vazhdon të jetë i vogël numri i kompanive të transporti dhe ne duhet të testojmë rrugë të ndryshme dërgesash midis Shqipërisë dhe Zvicrës”, thotë shefi i COOP-it, Wyss, transmeton albinfo.ch.

Dhe, ja si i përgjigjet ai pyetjes tjetër: “Spanja përdor tepër shumë ujë. A po e thani tani edhe tokën në Shqipëri?”. Jo, ne prodhojmë në mënyrë të qëndrueshme. Me regjimin tonë të ujit, ne garantojmë që të përdoret sa më pak ujë për rritjen e frutave dhe perimeve. Unë u binda vetë në terren se në Shqipëri po praktikohet bujqësia e qëndrueshme”.

---