Lajme

Studim japonez: Konsumi i djathit mund të ndihmojë në parandalimin e demencës

E mërkurë, 29 Tetor 2025 - 22:40 albinfo.ch
Keystone
Një studim i ri nga Japonia sugjeron se edhe një konsum i moderuar javor i djathit mund të ketë ndikim pozitiv në ruajtjen e funksioneve konjitive dhe në ngadalësimin e plakjes së trurit, raportoi news-medical.net.
Demenca po bëhet një shqetësim global gjithnjë në rritje, me parashikime që deri në vitin 2050 të preken mbi 150 milionë persona në mbarë botën. Edhe pse mjekësia ka bërë përparime të rëndësishme, trajtimet shëruese janë ende të kufizuara.
Në këtë kontekst, ushqyerja po shihet gjithnjë e më shumë si një faktor që mund të luajë rol mbrojtës. Djathi, për shembull, përmban vitamina, peptide dhe probiotikë që kontribuojnë në mbrojtjen e qelizave nervore përmes efekteve anti-inflamatore dhe metabolike.
Studimi është kryer mbi bazën e të dhënave të Studimit të Vlerësimit Gerontologjik të Japonisë (JAGES) të vitit 2019 dhe përfshiu persona mbi 65 vjeç. Rezultatet treguan se ata që konsumonin djathë të paktën një herë në javë kishin 21–24% më pak rrezik për të zhvilluar demencë krahasuar me të tjerët.
Për më tepër, analiza e mbijetesës tregoi një diferencë mesatare prej rreth 7.7 ditësh në favor të konsumatorëve të djathit.
Këto të dhëna përforcojnë idenë se edhe ndryshime të vogla në zakonet e përditshme të ushqyerjes, si përfshirja e djathit në dietë një herë në javë, mund të kenë ndikim të rëndësishëm në ruajtjen e shëndetit të trurit.

 Të tjera nga Lajme

Kosovë: Përfundon numërimi i votave nga diaspora, me kusht dhe atyre me nevoja të veçanta

 E-Diaspora

 Jeta në Zvicër