Sulmohet Konsullata e Kosovës në Kopenhagë

Sot, në orët e hershme të mëngjesit është sulmuar Konsullata e Republikës së Kosovës në Kopenhagë, në Mbretërinë e Danimarkës si dhe është dëmtuar Stema e Shtetit të Kosovës nga banditët dhe huliganët serbë në Danimarkë.

Kështu ka njoftuar ministri në detyrë i Jashtëm i Kosovës, Behgjet Pacolli.

“Ne e denojmë këtë veprim qyqar që shkel Konventën e Vjenës dhe sigurinë e ambienteve diplomatike dhe konsullore. Ne jemi duke punuar me autoritetet daneze për të sjellë përgjegjësit para drejtësisë. Sulmet e vazhdueshme të huliganëve serbë kundër ambienteve diplomatike dhe konsullore të Kosovës tregojnë vetëm frustrimin e politikës së ngecur të Serbisë, e cila ende nuk do të kuptojë se qe 11 vjet në Balkanin Perëndimor ekziston një shtet i pavarur që quhet Republika e Kosovës”, ka shkruar Pacolli.

Ai tutje ka thënë se “e dënojmë fuqishem propagandën serbe dhe fushatën agresive të Serbisë kundër Republikës së Kosovës”.