Të shtëna me armë zjarri afër Donald Trump, deklarohet zëdhënësi i tij, reagon Shtëpia e Bardhë

Keystone (AP Photo/Paul Sancya)

Në afërsi të ish-presidentit amerikan, Donald Trump janë dëgjuar të shtëna me armë zjarri.

Zëdhënësi i fushatës së tij, Steven Cheung ka deklaruar se kandidati republikan është i sigurt.

“Presidenti Trump është i sigurt pas të shtënave me armë zjarri në afërsi të tij. Nuk ka detaje të tjera për momentin”, ka deklaruar ai.

Tutje, sipas njoftimit Trump ishte duke luajtur golf në klubin ndërkombëtar të golfit “Trump”, në West Palm Beach.

Pas të shtënave, ai menjëherë është zhvendosur i sigurt nga Shërbimi Sekret, ndërsa sipas raportimeve nga “New York Post”, dy persona kanë shkëmbyer zjarr jashtë fushës së golfit dhe të shtënat me armë nuk kishin në shënjestër Trumpin, transmeton albinfo.ch.

Shtëpia e Bardhë ka reaguar pas ngjarjes duke thënë se është “e lehtësuar kur e di se” Donald Trump është i sigurt pasi u dëgjuan të shtëna pranë fushës së tij të golfit në Florida.

“Presidenti dhe zëvendëspresidentja janë informuar për incidentin e sigurisë në kursin ndërkombëtar të golfit Trump, ku ish-presidenti ishte duke luajtur golf. Ata janë të lehtësuar kur e dinë se ai është i sigurt. Ata do të mbahen të përditësuar rregullisht nga ekipi i tyre”, thuhet në deklaratën e Shtëpisë së Bardhë.