Thaçi:Nga janari 50 për qind rritje të pagave për mësimdhënësit

Nga janari i vitit të ardhshëm do të ketë rritje të pagave për 50 për qind, për mësimdhënësit e arsimit të mesëm dhe fillor. Këtë e bëri të ditur kryeministri në dorëheqje, Hashim Thaçi, pas takimit me kryetarin e Sindikatës së Bashkuar të Arsimit Ali Shabani. Thaçi në këtë rast tha se që në fillim të marrjes së mandatit të kësaj qeverie ka pasur premtime për këtë dhe tani do të realizohet, ka njoftuar RTK.

Partitë rivale me PDK-në e Thaçit kanë kontestuar legjitimitetin e këtij hapi të kryeministrit në dorëheqje dhe e kanë vlerësuar atë si një premtim zgjedhor ende pa filluar fushata parazgjedhore. Kryetari i Sindikatës së Arsimit të Kosovës Ali Shabani e ka quajtur vendimin e kryeministrit si realizim i një kërkese imediate të arsimtarëve të Kosovës.