T`u ofrohen shanse shkollimi profesional të rinjve “pa letra”

Në prag të vitit të ardhshëm shkollor, EKM kërkon nga kantonet që t`i trajtojnë në mënyrë më të hapur rastet e të rinjve pa letra dhe të familjeve të tyre

Të rinjtë “Sans-Papiers” (pa letra ose ilegalë) në Zvicër vazhdojnë të mos kenë qasje në shkollimin profesional ose mësimin e zanateve. Një ndryshim i rregullores i bërë më 1 shkurt 2013  i cili do të duhej t`ua mundësonte këtyre të rinjve ndjekjen e zanatit, nuk ka treguar efektin e pritur. Për këtë arsye në afat më të gjatë kërkohen zgjidhje të reja, thuhet në një komunikatë të EKM (Komisioni Federal për Migracion).

Në prag të vitit të ardhshëm shkollor, EKM kërkon nga kantonet që t`i trajtojnë në mënyrë më të hapur rastet e të rinjve pa letra dhe të familjeve të tyre.

Të rinjtë Sans-Papiers pa pasur leje speciale nuk kanë të drejtë të ndjekin mësimet në gjimnaz ose të studiojnë ndërsa po ashtu nuk kanë qasje të drejtpërdrejtë as në mësimin e zanatit. Që të mund të lidhin një kontratë për zanat atyre u kërkohet një leje pune dhe me këtë edhe një leje qëndrimi në Zvicër. Nga 1 shkurti i vitit 2013 është krijuar mundësia që këta të rinj të fitojnë një të drejtë të afatizuar të qëndrimit gjatë kohës së ndjekjes së mësimit për zanat. Sipas vlerësimit të ekspertëve, nga kjo mundësi do të mund të përfitonin në mes 200 dhe 400 të rinj në vit. Mirëpo në fakt, që nga hyrja në fuqi e kësaj rregulloreje të re, në Zyrën Federale për Migracion kanë ardhur vetëm dy kërkesa të të rinjve pa letra.

Kjo mospërputhje shpjegohet, sipas EKM-së me faktin se pragu që e ka caktuar rregullorja e re është shumë i lartë për të rinjtë pa letra. Është veçanërisht i madh rreziku për dëbim të cilit i nënshtrohen familjet në rastet kur këta persona e bëjnë publik identitetin e tyre.

EKM është e bindur se nevojitet një zgjidhje e re për të mundësuar në mënyrë të mirëfilltë qasjen e këtyre të rinjve në shkollimin profesional, sidomos për faktin se jemi në prag të fillimit të vitit të ri shkollor. Për këtë arsye EKM kërkon nga kantonet të ndihmojnë në hapjen e perspektivave të të rinjve pa letra.