Turistit italian i kthehet portofoli me 6 mijë euro nga 16-vjeçari shqiptar

I kishte humbur portofoli me 6 mijë euro, gjesti i shqiptarit bëhet viral

Gjesti i mirë i të riut shqiptar u komentua në tërë Shqipërinë, teksa fillimisht efektivët e policisë së Shkodrës u shtangën, kur në dyert e komisariatit u shfaq një i ri që kërkonte të dorëzonte para, përcjell albinfo.ch.

16-vjeçari Erind Shkambaj ishte nisur si çdo fundjavë tjetër për në punë, por rrugës, gjeti një portofol në tokë.

Ai i përkiste turistit italian Claudio Perrinella, i cili ishte ndalur në fshatin e Oblikës në Shkodër, ku banon Erindi, për të blerë diçka dhe pastaj portofoli i kishte rënë nga xhepi. Në të ishin karta e identitetit, karta të llogarive bankare dhe një shumë prej mbi 6000 eurosh.

Para për të cilat djaloshi duhet të punojë për shumë kohë për t’i fituar. Bujaria dhe fisnikëria e 16-vjeçarit u shpërblye me vetëm 100 euro nga ana e italianit.

Erindi na tregon se në familjen e tij të gjithë janë punëtorë të thjeshtë dhe janë mësuar që çdo gjë ta fitojnë me djersë.

Siç shkruan TCH, i riu gjatë javës vazhdon shkollën e mesme, ndërsa në fundjavë punon si ndihmës kamarier në një prej restoranteve në qytet. Pasditeve stërvitet fort me ekipin e Shkodrës me ëndrrën se një dite do të bëhet portier i madh.

---