UNDP e Gjermania i dhurojnë pajisje Policisë për kontrollin e armëve

Programi i Kombeve të Bashkuara për Zhvillim (UNDP), në bashkëpunim me Ambasadën e Gjermanisë në Kosovë, i ka dorëzuar Policisë së Kosovës dhe Agjencisë së Forenzikës pajisje për kontrollin e armëve të vogla dhe të lehta.

Zëvendësministri i Punëve të Brendshme të Kosovës, Abdylselam Shkodra tha se këto pajisje do të ndikojnë direkt në besueshmërinë e Agjencisë së Forenzikës për zbulimin apo të provuarit e armëve, përcjell albinfo.ch.

Ai tha se ky donacion gjithashtu përfshin trajnimin e personelit përkatës për përdorimin e duhur të pajisjeve të dhuruara.

Ambasadori gjerman në Kosovës, Christian Held deklaroi se qeveria gjermane në bashkëpunim me Francën është e angazhuar për shtimin e kontrollit të armëve të zjarrit.

“Mendoj që të gjithë e ndajmë interesin e përbashkët që të bëjmë më shumë në këtë fushë, sepse përdorimi i armëve të zjarrit është një brengë në Gjermani, në Francë, por gjithashtu edhe në këtë shtet. Pra unë jam shumë i lumtur që në mënyrë modeste të kontribuojmë në punën e shkëlqyeshme që është bërë këtu”, deklaroi ambasadori gjerman.