Universitetet zvicerane ende renditen lart, por “rrëshqasin” në vlerësime

Ndërsa ETH Zurich është ende universiteti më i mirë në Evropën kontinentale, në përgjithësi institucionet e arsimit të lartë të Zvicrës ranë në renditjen ndërkombëtare

Instituti Politeknik Federal i Cyrihut (ETH) është emëruar universiteti më i mirë në Evropën kontinentale nga Renditja e Universitetit Botëror të QS në vitin 2022 me 1,422 universitete, të përpiluar nga analistë globalë të arsimit të lartë, QS Quacquarelli Symonds, përcjell albinfo.ch.

Edhe pse ruajti titullin, ETH Zurich humbi një vend në krahasim me një vit më parë, duke rënë nga e teta në pozitën e nëntë. Tetë universitetet më të mira janë të gjitha në Mbretërinë e Bashkuar dhe Shtetet e Bashkuara.

ETH, një universitet kërkimor publik i fokusuar ekskluzivisht në shkencë, teknologji, inxhinieri dhe matematikë, mban pozicionin e tij kryesor në Evropën kontinentale për herë të 15-të me radhë.

Nga 10 universitetet zvicerane të listuara, tre – duke përfshirë shkollën simotër të ETH, Instituti Federal Politeknik i Lozanës (EPFL) – janë në 100 universitetet më të mira dhe shtatë në 250 më të mirët, përcjell tutje albinfo.ch.

Megjithatë, QS thekson se tetë institucione zvicerane kanë humbur gradën. “Vetëm Universiteti i Bazelit po përparon, ndërsa Universiteti i Zvicrës Italiane mbetet i qëndrueshëm”.

Të gjitha universitetet vlerësohen në bazë të kritereve si reputacioni akademik dhe i punëdhënësit; citimet e fakultetit (matja e ndikimit të kërkimit); raporti fakultet/student (indeksi i kapacitetit mësimor); dhe raporti ndërkombëtar i profesorëve dhe studentëve (masë e ndërkombëtarizimit të një universiteti).

“ETH Zurich gëzon reputacionin më të mirë ndërkombëtar në vend, duke u renditur në vendin e 18-të dhe të 51-të globalisht në treguesit e reputacionit akademik dhe të punëdhënësit”, tha QS.

Universitete të tjera zvicerane të vlerësuara në anketë janë Universiteti i Cyrihut (vendi i 83-të), Bernë (120), Gjenevë (125), Bazel (136), Lozanë (203), Svizzera Italiana (240), St. Gallen (501) dhe Friburgu (571).

---