Urime ditëlindja e 20, Shaq`!

Xherdan Shaqiri sot, mbush 20 vjet. Festa e ditëlindjes duhet të presë. Më parë ai me kombëtaren duhet të luajë ndeshjen kundër Malit të Zi

Futbollisti aktualisht më i vlerësuar i Zvicrës, Xherdasn Shaqiri ka sot ditëlindjen e njëzetë. Ka qenë pikërisht 10 tetori i vitit 1991 kur futbollisti i ardhshëm është lindur në Gjilan të Kosovës. Vetëm një vit më vonë, prindërit e Xherdanit me Arianitin dhe Erdinin vijnë në Zvicër ku vendosen në Baselland të Zvicrës. Këtu, para 11 vitesh lind edhe motra, Medina.

Ndonëse ditëlindjen e ka sot, festimi i saj duhet të presë. Xherdani është shumë i zënë me përgatitjet për ndeshjen kundër Malit të Zi që skuadra zvicerane e luan të martën.

20minutenonline.ch përcjell urimet e miqve dhe kolegëve nga kombëtarja zvicerane për Shaqirin. Urimi i bashkëlojtarit të tij nga FC Basel dhe nga kombëtarja Fabian Frei është që “Xherdani të gëzojë shëndet të mirë dhe shumë fat në vendimet që ai me siguri duhet t`i marrë së shpejti”.

Ndërsa Granit Xhaka, po ashtu bashkëlojtar dhe bashkatdhetar i Shaqirit i dëshiron atij që “të mbetet i tillë çfarë është”.

Admir Mehmedi i FC Zürich-ut, me të cilin Shaqiri ka një miqësi ehde jashtë fushës së futbollit, dhe te familja e të cilit në Winterthur ai shpesh kalon edhe kohën e lirë, ka një urim specifik për Shaq-in: “I dëshiroj një grua të bukur dhe më pak kilogramë…”

Vetë Xherdani është modest në dëshirat e tij. “Të kem shëndet dhe të mos kem lëndime të rënda. Edhe një fitore kundër Malit të Zi. Ne dëshirojmë të tregojmë se e kemi merituar të marrim pjesë në Kampionatin Evropian”.