Valentina Marevci vjen me pikturat “Brez pas brezi” në Cyrih

Valentina Marevci, krijuese e re nga Kosova, ka sjellë të shtunën në Cyrih pikturat e saj në Zvicër për t’i prezantuar para artdashësve të këtushëm shqiptarë

Artistja Valentina Marevci, e cila përjetëson sakrificën dhe krenarinë e heronjve brezë pas brezi nëpërmjet veprave të artit, ka shpalosur vlerat artistike para artdashëve shqiptarë që jetojnë dhe veprojnë në Zvicër.

Ekpozita personale e titulluar “Brez pas brezi” është hapur të shtunën në Qendrën Kulturore të Kosovës në Cyrih.

Bëhet fjalë për ekspozitën personale, të pestën me radhë, që është titulluar „Brez pas brezi“.

Shukrije Ramadani hapjen zyrtare të kësaj ekspozite e nisi me një minutë heshtje për të nderuar artistin, baletmaestrin e njohur shqiptar, Rrustem Selca.

Në hapje foli edhe diplomati kosovar, Xhafer Ameti, njëherësh edhe paraqitja e parë, në cilësinë e konsullit në Cyrih, raporton albinfo.ch.
“Është më se domethënëse të vijnë edhe të prezantojnë artistët veprat e tyre në diasporë dhe e vlerësojmë edhe punën e Qendrës Kulturore, e cila po sjell një pjesë të kulturës para pjesëtarëve të diasporës”, tha konsulli i Kosovës në Cyrih, Xhafer Ameti, duke shfrytëzuar rastin për të falënderuar diasporën për kontributin e vazhdueshëm që ka dhënë për Kosovën.

Qëllimi i ekspozitës së artistes Valentina Marevci është të afrojë shqiptarët në diasporë me Kosovën.

Për të treguar se “Brezë pas brezi” është njëjtë si këtu dhe atje, ruajtja e identitetit dhe traditave, ku brezi e simbolizon lidhjen shpirtërore dhe emocionale me simbolikën e shqiponjës që është edhe krenaria e të gjithë shqiptarëve, u tha në hapje të ekspozitës, ndërsa autorja ka folur për frymëzimin dhe domethënien e pikturave të saj.

Autorja me shqiponjën në ekspozitë tregon sakrificën dhe krenarinë e heronjve tanë nëpër breza.

Piktorja Marevci kishte sjellë me vete edhe pikturat që kanë gati të njëjtën tematikë, koralet, të cilat janë pjesë domethënëse e krijimtarisë së saj artistike.

Në pikturat e saj dominojnë ngjyrat e ngrohta, të cilat i ka punuar vaj në pëlhurë me dimensione standarde.

Ekspozita e Valentina Marevcit me motive kombëtare dhe ato të botës nënujore do të jetë e hapur deri më 8 nëntor në Qendrën Kulturore të Kosovës në Cyrih.