Varianti ‘Delta’, ndër viruset më ngjitëse që njeh shkenca

(AP Photo/Jessica Hill)

Zyrtarët amerikanë të shëndetësisë kanë paralajmëruar se varianti ‘Delta’ i coronavirusit është ndër viruset më ngjitëse që njeh shkenca.

Përgjatë një konference virtuale shtypi, drejtoresha e Qendrës për Kontrollin dhe Parandalimin e Sëmundjeve, Rochelle Walensky, cilëson se varianti Delta i koronavirusit është një nga viruset më ngjitëse që ajo ka hasur në karrierën e saj 20-vjeçare, pasi “po përhapet me shpejtësi të madhe dhe tani përbën mbi 83 për qind të infektimeve në Shtetet e Bashkuara”.

Në këtë mënyrë, zyrtarët amerikanë të shëndetësisë po u bëjnë thirrje të gjithë të pavaksinuarve që të imunizohen për të mbrojtur veten dhe të tjerët. Gjithashtu vazhdojnë edhe këshillat për të mbajtur maskën në rast se një qytetar nuk ka marrë vaksinën anti-COVID.

Presidenti amerikan, Joe Biden, deklaroi sot se infektimet e reja po shfaqen te ata njerëz që nuk e kanë marrë ende vaksinën.

“Ne ndjekim shkencën dhe rekomandimet e ekspertëve. Po vërejmë një valë të re pandemie tek personat e pavaksinuar. Nëse je vaksinuar, atëherë je i sigurt. Nëse ke marrë vaksinën, atëherë ti ke 98% mundësi të mos infektohesh. Por dhe nëse infektohesh, nuk do të të duhej të shtroheshe në spital, mbase nuk do të kesh as shenja të virusit. Vaksinat janë të efektshme ndaj të gjitha varianteve, përfshirë edhe atij Delta”, tha presidenti Biden.