Vdekja e azilkërkuesit, reagon edhe ambasada franceze

Ambasada franceze ka reaguar nëpërmjet një njoftimi për rastin e Florenc Beqirit, të riut shkodran që ndërroi jetë në Marsejë, përcjell albinfo.ch.

Ambasada i shpreh ngushëllime familjarëve dhe të afërmve të Florencit dhe bën me dije se në ditët në vijim do të kryhet autopsia, ndërkohë që vazhdojnë hetimet në Marsejë për të përcaktuar shkaqet e plota të kësaj drame.

Pas ambasadës franceze në Tiranë, për vdekjen e 23-vjeçarit shqiptar në Marsejë, ka reaguar edhe Ministria për Evropën dhe Punët e Jashtme, në Tiranë, duke bërë me dije se ambasada shqiptare në Francë, është njoftuar hap pas hapi për ngjarjen, nga autoritetet vendase.

Ministria për Evropën dhe Punët e Jashtme, e Republikës së Shqipërisë, informon opinionin publik se Ministria e Brendshme e Francës ka njoftuar Ambasadën e Shqipërisë në Paris, përmes një komunikimi zyrtar, mbi vdekjen e shtetasit shqiptar Florenc Beqiraj në qendrën spitalore Marseille-Nord.

Në këtë komunikim sqarohet se, më 14 dhjetor 2017, rreth orës 17.30, shtetasi Florenc Beqiraj u gjet i pandërgjegjshëm në dhomën e tij, në Qendrën e Ndalimit Administrativ në Marsejë, pasi ishte shoqëruar më parë atje pas vendimit administrativ të Prefekturës, për largim nga territori francez.

Zotit Florenc Beqiraj iu dha menjëherë përkujdesja e urgjencës dhe ai u transportua në qendrën spitalore të Marseille-Nord. Prokuroria e Marsejës u njoftua në të njëjtën ditë për ngjarjen dhe një hetim mbi ngjarjen ka nisur menjëherë.

Pas disa ditësh në koma të thellë, në datën 21 dhjetor, ora 18:30, u konstatua vdekja e z. Florenc Beqiraj. Trupi i tij u transportua në pavionin e mjekësisë ligjore të Marsejës, më 23 dhjetor, konform udhëzimeve të Prokurorisë, e cila kërkoi të kryhej autopsia. Autopsia do të kryhet në ditët e ardhshme, ndërkohë që hetimi vazhdon.