Shqipëria

Vëllai i ministrit Fatmir Xhafaj, Agroni, dorëzohet tek autoritetet italiane

Vëllai i ministrit të Brendshëm të Shqipërisë, Fatmir Xhafaj, Agroni, ka marrë vendim për t’iu dorëzuar autoriteteve italiane. Xhafa, përmes një letre publike thotë se ka vendosur të paraqitet sot në Itali tek autoritetet përkatëse.

Ai thotë se e ka marrë këtë vendim, edhe pse nuk ka pasur asnjëherë asnjë kërkesë dhe asnjë interes nga organet e drejtësisë italiane për të ekzekutuar këtë vendim, përcjell albinfo.ch.

Agron Xhafaj thotë se i detyrohet bashkëshortes dhe dy fëmijëve, të cilëve iu është përkushtuar maksimalisht. Ai e pranon se ka gabuar në rininë e tij.

“Për rreth një dekadë kam bërë disa kërkesa për t’u pajisur me vizë pikërisht për të ndjekur pranë drejtësisë italiane çështjen time. Në të gjitha rastet kjo kërkesë më është refuzuar”, thotë ai.

Agron Xhafaj ka ngritur kallëzim penal në Prokurori ndaj tre zyrtarëve të Partisë Demokratike, Enkelejd Alibeaj, Gazmend Bardhi dhe Ervin Salianji, të cilët publikuan të hënën audiopërgjimin, përmes të cilit pretendonin se Agron Xhafaj vazhdon të ushtrojë aktivitetin kriminal të trafikimit të drogës në Vlorë.