Viktimat e dhunës seksuale u lanë anash për vite të tëra

Kryeministri Ramush Haradinaj tha se çështja e barazisë gjinore në Kosovë është e vonuar, teksa theksoi se edhe më e ndjeshme është çështja e viktimave të dhunës seksuale

Të mbijetuarit e dhunës seksuale gjatë luftës së fundit në Kosovë nuk janë përmendur fare si kategori e viktimave të luftës, ka thënë ish-presidentja e Kosovës, Atifete Jahjaga, në konferencën “Përtej mbështetjes financiare”, ku u diskutua për mundësinë e krijimit të programit për trajtim të traumës. Program, i cili, sipas saj, do të ndihmojë të përmbushet boshllëku ekzistues në ofrimin e shërbimeve të nevojshme për mbi 20 mijë burra dhe gra të dhunuara gjatë luftës në Kosovë.

Jahjaga tha se mbështetja financiare, e cila deri më tani ka munguar për viktimat e dhunës seksuale në Kosovë, nuk mjafton. Për këtë ajo theksoi se nevojitet përkrahje e vazhdueshme për këtë kategori.

Kryeministri Ramush Haradinaj tha se çështja e barazisë gjinore në Kosovë është e vonuar, teksa theksoi se edhe më e ndjeshme është çështja e viktimave të dhunës seksuale. Ai shprehu mbështetjen e tij të plotë për këtë kategori të ndjeshme të shoqërisë.