Vozitësi i kamionit nga Maqedonia shkakton dëm prej njëqind mijë eurosh

Një vozitës 47-vjeçar nga Maqedonia, me kamionin e tij e ka goditur një rimorkio të kamionit nga Polonia që ishte i ndalur në vend

Mbrëmjen e së premtes, rreth orës 18.05, në autostradën gjermane A1 ka ndodhur një aksident midis dy kamionëve, që ka sjellë në bllokimin e tërësishëm të autostradës. dhe dëme të mëdha materiale. Aksidenti ka ndodhur në mes të Wildeshausen-West dhe Wildeshausen-Nord në drejtim të Bremenit.

Një vozitës 47-vjeçar nga Maqedonia, me kamionin e tij e ka goditur një rimorkio të kamionit nga Polonia që ishte i ndalur në vend. Gjatë goditjes, pjesa më e madhe e ngarkesës është derdhur nëpër autostradë, e cila për shkak të këtij aksidenti është dashur të bllokohet tërësisht në drejtim të Wildeshausen-West.

Aksioni i shpëtimit dhe pastrimi i vendngjarjes kanë zgjatur deri në ora 22.45. Për fat të mirë, në aksident nuk ka pasur të lënduar, shkruajnë mediat gjermane, përcjellë Albinfo.ch.

Kamioni i vozitësit nga Maqedonia nuk ka qenë më në gjendje të drejtohet dhe e kanë larguar nga vendi i aksidentit me automjete përkatëse. Dëmi i shkaktuar vlerësohet në njëqind mijë euro.

(Foto ilustrim)