Lajme

Vrasje e rëndë në Pejë, u gjet i djegur në veturën e tij

Një vrasje e rëndë ka ndodhur në Pejë. Këtë e konfirmoi për mediat në Prishtinë Shkodran Nikçi nga Zyra e Prokurorisë në Pejë.

Është bërë e ditur nga mediat në Prishtinë se bëhet fjalë për ish-pjesëtarin e Ushtrisë Çlirimtare të Kosovës, Qerim Kelmendi, i cili u gjet i djegur në veturën e tij në fshatin Zahaq të Komunës së Pejës, gjatë orëve të para të mëngjesit të së enjtes. Qerimi kishte qenë njëri nga ushtarët e parë të UÇK-së, përcjell albinfo.ch.

Së fundmi, Policia e Kosovës ka dhënë detaje lidhur me vdekjen e Qerim Kelmendit.

Përmes një raporti, thotë se trupi është gjetur brenda një veture të djegur në fshatin Zahaq të Pejës.

“Gjatë kohës derisa zjarrfikësit ishin duke lokalizuar zjarrin në brendësi të veturës është vërejtur një person (viktimë mashkull) trup i karbonizuar. Vendit të ngjarjes i janë përgjigjur njësitet relevante të sektorit rajonal të hetimeve, njësiti K9, si dhe prokurori i shtetit dhe ekipi mjekësor, të cilët kanë konstatuar vdekjen e viktimës”, thuhet në raportin e policisë.

PK-ja thotë se gjatë shikimit të vendit të ngjarjes është konstatuar se vetura e djegur është e tipit VW Passat me targa vendore.

“Sektori Rajonal i Hetimeve pranë Drejtorisë Rajonale të Policisë në Pejë, në bashkëpunim të plotë me prokurorin e shtetit janë duke u marrë të gjitha veprimet hetimore për të sqaruar rrethanat e këtij rasti të cilësuar ‘vrasje’ dhe janë duke u bërë përpjekje maksimale për të identifikuar kryesin ose kryesit e mundshëm”, përfundon raporti.

Këtë e konfirmoi edhe Shkodran Nikçi nga Zyra e Prokurorisë në Pejë.

“Prokurori kujdestar ka dalë në vendin e ngjarjes mbrëmë pas mesnate, ku kanë hasur në një trup të pajetë”, tha Nikçi. Ai shtoi se janë duke u zhvilluar hetime dhe duke u ndërmarrë të gjitha masat e nevojshme. /Albinfo.ch