Xhaka heq dilemat: “Kam vendosur për Zvicrën dhe nuk e ndryshoj qëndrimin!”

"Shaqiri, Behrami, unë dhe shumë të tjerë kemi qenë përgatitës të terrenit që Kosova të njihet nga UEFA dhe FIFA. Kështu ne e kemi dhënë kontributin tonë”, ka thënë Granit Xhaka.

Xhaka, Shaqiri, Behrami dhe lojtarët tjerë shqiptarë të kombëtares zvicerane janë bërë prej kohësh pjesë e debateve të nxehta lidhur me atë se a do të luajnë për Kosovën apo për Zvicrën, shkruan albinfo.ch. Kohëve të fundit, në prag të Evropianit 2016, këto debate, sidomos nga ana zvicerane vetëm sa janë polarizuar më tepër, duke vënë në siklet lojtarët në fjalë.

Atyre u është zënë për të madhe përse nuk përcaktohen qartë se për cilin ekip duan të luajnë, duke i kritikuar përse lënë hapësirë spekulimi se mund të kalojnë në Kombëtaren e Kosovës, apo më herët, edhe atë të Shqipërisë.

Në këtë kontekst më së shpeshti është “sulmuar” Xhaka, duke iu referuar deklarimeve ë tij të mëhershme se lidhur me angazhimin eventual për Kosovën do të mendojë vetëm pasi që kombëtarja kosovare të pranohet në UEFA dhe FIFA. Tash kur kjo ka ndodhur,  Xhaka me një deklaratë dhënë portalit blick.ch ka hequr dilemat: “Kjo nuk ka qenë kurrë temë në familjen tonë. Unë kam vendosur për Zvicrën dhe mbetem pranë këtij vendimi”, citon portali Granit Xhakën.

Më tutje ai citohet të ketë thënë se “nuk dëshiron t`ua zë vendin shumë talenteve të rinj kosovarë. Ata e kanë merituar të luajnë për Kosovën, të tregojnë veten, përcjell albinfo.ch. “Shaqiri, Behrami, unë dhe shumë të tjerë kemi qenë përgatitës të terrenit që Kosova të njihet nga UEFA dhe FIFA. Kështu ne e kemi dhënë kontributin tonë”, ka thënë Granit Xhaka.