Zbulohen laboratorët ku falsifikoheshin viza amerikane dhe britanike

Grupi dyshohet se ka trafikuar rreth 1000 shtetas shqiptarë, të cilët paguanin deri në 30 mijë dollarë për një vizë kanadeze apo amerikane

Në Tiranë janë zbuluar dy laboratorë ku falsifikoheshin viza amerikane dhe britanike.

Operacioni është zhvilluar nga Policia e Tiranës me urdhër të Prokurorit të Tiranës, Vladimir Mara i cili ka kryer edhe hetimet.

Mësohet se në pranga kanë rënë 13 persona. Në laborator prodhoheshin viza për në Shtetet e Bashkuara të Amerikës dhe Mbretërinë e Bashkuar, përcjell albinfo.ch.

Në mars të këtij viti u zbulua një rrjet i organizuar i falsifikimit të vizave për në SHBA, Kanada dhe Britaninë e Madhe.

Në pranga ranë 40 persona, mes tyre edhe pesë efektivë policie. Grupi dyshohet se ka trafikuar rreth 1000 shtetas shqiptarë, të cilët paguanin deri në 30 mijë dollarë për një vizë kanadeze apo amerikane, raportojnë mediat shqiptare.

Shumica e emigrantëve kanë udhëtuar me avion drejt këtyre vendeve, ndërsa pagesat kundrejt trafikantëve bëheshin në dy pjesë. Një pjesë ‘cash’ në Shqipëri dhe një pjesë me agjencitë e transfertave të parave kur ata mbërrinin në destinacion.