Zvicër: Kthim në normalitet pas 750 ditësh “abnormale”

"Kthimi në situatën normale është bërë i mundur sepse shëndeti publik nuk ka gjasa të jetë në rrezik në muajt e ardhshëm - megjithëse virusi është ende këtu"

Vendimi i Qeverisë së Zvicrës për heqjen e detyrimit të maskës në transportin publik dhe në objektet shëndetësore si dhe të detyrimit për izolim, ishte një vendim i pritur, gjegjësisht, i paralajmëruar, shkruan albinfo.ch. Megjithatë, duke vendosur kështu, Këshilli Federal ka ndërmarrë një veprim domethënës dhe jo të lehtë, marrë parasysh faktin se koronavirusi vazhdon të veprojë, edhe në Zvicër.

Duke folur para gazetarëve në konferencën e sotme për media, Berset ka kujtuar fillimisht “situatën e jashtëzakonshme” (emërtimi zyrtar i situatës) që kishte zgjatur 95 ditë. Pas kësaj, Zvicra ishte në një “situatë të veçantë” për 668 ditë. “Kthimi në situatën normale është bërë i mundur sepse shëndeti publik nuk ka gjasa të jetë në rrezik në muajt e ardhshëm – megjithëse virusi është ende këtu”, ka thënë Berset.

Koha për kthim në normalitet

Të gjithë aktorët tashhmë kanë mësuar shumë reth trajtimit të virusit dhe situata tani ka ndryshuar rrënjësisht. Tani është koha për të rivendosur ndarjen normale të pushteteve midis Qeverisë Federale dhe kantoneve, transmeton albinfo.ch. “Pas dy viteve të pandemisë, ne mund të shikojmë të ardhmen me besim”, përfundon Berset.

Një gazetar do të donte të dinte pse Zyra Federale e Shëndetit Publik (BAG), duke filluar javën që vjen, do të japë informacion për numrin aktual të rasteve vetëm një herë në javë dhe jo më çdo ditë. Kjo pyetje vjen, “duke pasur parasysh numrin aktualisht mjaft të lartë të infeksioneve të reja”, ka thënë gazetari.

Situata me Korona do të vazhdojë të monitorohet nga afër

“Ne jemi mësuar të marrim informacione për pandeminë çdo ditë,” përgjigjet Këshilltari Federal Alain Berset. “Ne do të vazhdojmë të monitorojmë, por besojmë se në situatën normale mjafton përditësimi i numrit të rasteve në javë. Nëse është e nevojshme, ne mund t’i kthehemi shumë shpejt raportimit të rregullt.”

Sipas Berset, edhe monitorimi i numrave të koronës tani duhet t’i përshtatet situatës normale, përcjell albinfo.ch. Situata po monitorohet nga afër me testimin e ujërave të zeza, ndër të tjera. Patrick Mathys nga BAG shton: Të dhënat do të vazhdojnë të vlerësohen çdo ditë, por do të publikohen vetëm çdo javë.

 

---