Lajme

Në vitin 2023, në Zvicër pirja e kafesë do të kushtojë më shtrenjtë

Sipas Cafetiersuisse, një rritje prej të paktën 40 centëve do të ishte e nevojshme për të "siguruar qëndrueshmërinë e bizneseve"

Pirja e kafesë në Zvicrën gjermanishtfolëse ishte shtrenjtuar tashmë edhe në vitin që po lëmë pas. Çmimi mesatar për një “krem ​​kafe” (emërtimi i kafes standarde me krem, në Zvicër) është rritur me 9 centë ose “rapë” duke arritur çmimin mesatar prej 4.39 frangash, transmeton albinfo.ch.

Këtë e tregon një sondazh i realizuar me 650 kafene dhe bistro nga grupi i interesit Cafetiersuisse.

Por, në vitin e ardhshëm, kafeja duket se do të bëhet edhe më e shtrenjtë, madje shtrenjtimi pritet që kësaj radhe të jetë më i madh se ai që u bë gjatë vitit 2022, shkruan srf.ch.

Sipas Cafetiersuisse, një rritje prej të paktën 40 centëve do të ishte e nevojshme për të “siguruar qëndrueshmërinë e bizneseve” në sektorin e kafeneve.

Arsyet për këtë janë pagat paksa më të larta në tregtinë e hotelierisë dhe çmimet më të larta të lëndëve të para.

Megjithatë, pavarësisht çmimeve më të larta që priten në vitin që vjen, Cafetiersuisse pret që bumi zviceran i pirjes së kafesë jashtë shtëpisë të vazhdojë.