Zvicër: Vijnë italianët, shkojnë gjermanët

Zvicra ka 11 mijë italianë më shumë se një vit më parë. Fjala është për shtimin “neto” të këtij numri, kur hiqen ata italianë që e kanë lëshuar Zvicrën

Numri i italianëve që kanë ardhur në Zvicër gjatë vitit 2015 ka qenë më i madhi në krahasim me numrin e të gjithë të huajve të tjerë që gjatë kësaj periudhe janë bërë banorë të Zvicrës. Siç shkruan gazeta ”Schweiz am Sonntag” duke iu referuar të dhënave nga autoritetet e shtetit. Sipas tyre, rritja e numrit të italianëve që në vitin 2015 kanë ardhur për të jetuar në Zvicër ka qenë më i madhi, gjegjësisht Zvicra ka 11 mijë italianë më shumë se një vit më parë. Fjala është për shtimin “neto” të këtij numri, kur hiqen ata italianë që e kanë lëshuar Zvicrën.

Në vendin e dytë për nga rritja  vijnë francezët, ndërkohë që numri i gjermanëve që jetojnë në Zvicër, në vitin 2015 ka pësuar vitin e kaluar për herë të parë një rënie, transmeton albinfo.ch. Kështu, për herë të parë pas disa vitesh avancimi, komuniteti gjerman sërish ia lë vendin e parë atij italian. Te gjermanët po shënohet një trend kthimi në vendin e tyre, konstaton gazeta.

Ndryshe nga fazat e mëhershme të migracionit italian, aktualisht nga ky vend në Zvicër po vijnë më shumë njerëz me shkollim të lartë gjegjësisht pjesëtarë të elitës italiane.