Zvicra barazon me Anglinë

Krahas tashmë “veteranëve”: Behrami, Xhemajli dhe Shaqiri, u angazhuan edhe dy futbollistët e rinj shqiptarë: Granit Xhaka e Admir Mehmedi

Zvicra është ndarë baraz në ndeshjen me skuadrën e madhe të Anglisë, në stadiumin Wembley të Londrës. Dy golat për Zvicrën i shënoi Barneta. Barazimi me një superfuqi të futbollit, për më tepër në fushë të huaj do të ishte i denjë për tu kremtuar por një pikë e fituar në Angli nuk e përmirëson shumë pozitën e Zvicrës në tabelën e kualifikimeve për Evropianin 2012. 

Megjithatë, opinioni futbolldashës i Zvicrës, këtë barazim që është realizuar nga një ekip i përtëritur, ku u angazhuan për herë të parë edhe dy futbollistë të rinj shqiptarë, e vlerëson si depërtim i një “fryme të re”. Kjo frymë, pritet që së paku në kualifuikimet për botërorin 2014 të gjejë shprehjen e saj të vërtetë. 

Krahas tashmë “veteranëve” Behramit, Xhemajlit dhe Shaqirit, në ndeshjen kundër Anglisë, që përfundoi me rezultat të barabartë 2 :2 u angazhuan edhe dy futbollistët tjerë shqiptarë: Granit Xhaka e Admir Mehmedi. 

Xhaka, mesfushori prej të cilit futbolli zviceran pret shumë, u angazhua që nga fillimi, bashkë me dy mesfushorët tjerë, Behrami e Shaqiri. Ndërsa Behrami u lëndua dhe mori edhe karton të verdhë, dy më të rinjtë Shaqiri dhe Xhaka luajtën deri në fund të ndeshjes. 

Behramin në minutën 58 e zëvendësoi lojtari tjetër shqiptar, Blerim Xhemajli. Në minutën 74 debutoi për kombëtaren e Zvicrës edhe lojtari tjetër shqiptar nga Maqedonia, Admir Mehmedi, i cili luajti në vend të Derdiyok-ut.

Me lojë të mirë nga shqiptarët u dalluan sidomos Xhaka dhe Shaqiri ndërsa Mehmedi pati edhe një shans të mirë për gol.