Zvicra do të kandidojë për një vend në Këshillin e Sigurimit

Në vitin 2012 Qeveria do të vendosë për kandidimin, ndërsa koha kur Zvicra mund të marrë vendin e saj në KS mund të jetë viti 2024

Zvicra mund të bëhej pa problem anëtare e Këshillit të Sigurimit të OKB-së. Statusi i saj si shtet neutral nuk do të paraqiste ndonjë pengesë për këtë. Kështu është shprehur presidentja e re e Zvicrës dhe ministrja e jashtme, Micheline Calmy Rey në një intervistë dhënë gazetës „Aargauer Zeitung”.

Edhe shtete të tjera neutrale si Austria tashmë kanë pasur postin e shtetit anëtar të Këshillit të Sigurimit, ka thënë ajo. Neutraliteti, sipas presidentes, ndalon Zvicrën të marrë pjesë në konfliktet në mes të shteteve ndërsa Këshilli i Sigurimit ka në një kuptim funksionin e policit që synon vendosjen erendit paqësor në botë.

Zonja Rey ka dhënë edhe afatin në të cilin mendon se Zvicra duhet të kandidojë për këtë pozitë. Do të jetë viti 2012 kur Qeveria Federale do të vendosë rreth kësaj, ndërsa koha kur Zvicra mund të marrë vendin e saj në KS mund të jetë viti 2024.