Jeta në Zvicër

Zvicra gjobit dy kompani autobusësh

Administrata federale zvicerane e doganave ka kryer një hetim penal kundër dy kompanive të autobusëve. Ato dyshohet se gjatë tre viteve, kanë realizuar pothuajse 1000 transporte të ndaluara në Zvicër, shkruajnë mediat zvicerane, përcjell Albinfo.ch

Qeveria zvicerane ka filluar hetimin! Administrata federale doganore e Zvicrës, të martën njoftoi se kishte kryer një hetim penal kundër dy kompanive të autobusëve. Tashmë janë vendosur sanksionet e para të ndjeshme: Të dy kompanitë duhet të paguajnë një taksë prej 645’000 frangash. Përveç kësaj, të dy kompanitë duhet të ballafaqohen me “gjoba të larta”.

Arsyeja: Dy kompanitë kanë kryer disa herë transportime të paligjshme në brendësi të Zvicrës. Në mes vjeshtës 2015 dhe vjeshtës 2017, administrata doganore llogariti  një total prej 926 udhëtimeve të ndaluara. Gjithsej u përdorën 41 autobusë.

Se cilat kompani janë prekur nga ky hetim, nuk është bërë e ditur. “Arsyeja është ankesa e të dy kompanive kundër hetimit penal doganor. Deri në verdiktin përfundimtar, do të zbatohet prezumimi i pafajësisë”, ka thënë Michael Steiner, zëdhënës i administratës federale të doganave, për “Blick”, përcjell Albinfo.ch.

Steiner thjesht tha: “Të dy kompanitë kanë një seli brenda dhe jashtë vendit. Automjetet janë regjistruar jashtë vendit”.