Zvicra në vitin 2010 përjetoi një “babyboom” të vërtetë

Në maternitetin më të madh, atë të Spitalit Universitar të Gjenevës, në mëngjesin e të premtes është shënuar lindja e 4000-të e vitit

Viti 2010 ka qenë shumë i “frytshëm” për Zvicrën, nga aspekti i natalitetit. Në shumë spitale të këtij vendi është shënuar një rritje mbimesatare e lindjes së foshnjave. Siç shkruan gazeta “Berner Zeitung” disa reparte të lindjes madje kanë shënuar rekorde në numrin e lindjeve.

Në maternitetin më të madh të Zvicrës, atë të Spitalit Universitar të Gjenevës, në mëngjesin e të premtes (31 dhjetor 2010) është shënuar lindja e 4000-të e vitit, ndërsa në mesditën e ditës së njëjtë numri i lindjeve ishte ngjitur tashmë në 4006!

Një “babyboom” i vogël është regjistruar edhe në kantonin Argau. Kështu, në spitalin kantonal në Baden janë bërë gjatë vitit 2010 gjithsej 1600 lindje, ose 300 më shumë se zakonisht. Edhe në spitalin SalemSpital të qytetit Biel-Bienne, në vitin që kaloi, për herë të parë janë realizuar më shumë se 1000 lindje.