Zvicra nuk i paguan kompensim gruas siriane që humbi fëmijën

Pavarësisht pranimit të dështimit, Departamenti Federal i Financave nuk pranon t'i japë dëmshpërblim nënës së foshnjës së vdekur

Në verën e vitit 2014, një foshnjë e palindur e prindërve refugjatë kishte vdekur ndërsa familjarët e saj po ktheheshin në Itali.

Për rastin e saj, një roje kufiri qe dënuar me burgim me kusht, shkruan 20 minuten.

Por, pavarësisht pranimit të dështimit, Departamenti Federal i Financave nuk pranon t’i japë dëmshpërblim nënës së foshnjës së vdekur.

Gruaja kishte lindur fëmijën e vdekur në spitalin në Domodossola të Italisë, transmeton albinfo.ch.

Atje ishte detyruar të shkonte pasi që autoritetet zvicerane e kishin dëbuar, duke e kthyer në Itali, ku familja kishte qenë para se të kalonte në Zvicër për të kërkuar azil atje.

Rojtari i kufirit i cili nuk kishte siguruar ndihmë mjekësore, megjithëse gruaja në fazën e fundit të shtatzanisë ishte ankuar për dhimbje, më pas u dënua për sulm dhe mosrespektim të rregullave të shërbimit.

Sipas SRF, një analizë e brendshme e çështjes në administratën doganore kishte treguar se një pagesë kompensimi deri në 10.000 franga për gruan, ishte e justifikuar.

Por, EFD mori qëndrimin se rojtari kufitar edhe pse ishte dënuar për dëmtime trupore, nuk mund të mbahej përgjegjës për vdekjen e foshnjës.

Avokati i nënës ka njoftuar se ajo do ta çojë çështjen në Gjykatën Federale Administrative.

LAJME INTERESANTE NGA INTERNETI