AUTOTECH

Lista serbe nuk do ta formojë AKS-në njëanshëm

Presidenti Aleksandar Vuçiq ka njoftuar se serbët e Kosovës nuk do ta formojnë në mënyrë të njëanshme Asociacionin e komunave me shumicë serbe, edhe pse një gjë të tillë e kishin paralajmëruar.

Vuçiq ka kërkuar nga ta që të presin edhe tre muaj e gjysmë, duke respektuar kështu afatin e përcaktuar nga Bashkimi Evropian, përcjell albinfo.ch.

Vuçiq tha se sot do të bisedojë me Përfaqësuesen e Lartë të BE-së, Federica Mogherini, duke konfirmuar se temë kyçe do të jenë raportet mes Beogradit e Prishtinës. “Serbët s’do ta formojnë Asociacionin as nesër, e as pasnesër. Kemi pritur pesë vjet, do të presim edhe këta tre muaj, që askush të mos i akuzojë serbët se po i shkelin marrëveshjet dhe dakordimet ndërkombëtare. Kanë thënë se për tre muaj e gjysmë do të dalin me statutin e Asociacionit. Serbia do të presë edhe tre muaj e gjysmë”, ka deklaruar presidenti serb.