15 mijë nënshkrime për të kandiduar për president

Mandati i presidentit do të jetë pesëvjeçar, që të mos përkojë me përfundimin e mandatit të Kuvendit dhe të kryeministrit

Zgjedhja e presidentit të Republikës së Kosovës nga populli është një ndryshim kushtetues shumë i domosdoshëm, sepse do të krijojë stabilitet, i cili do të përfaqësojë unitetin qytetar dhe kombëtar, ka vlerësuar deputeti Arsim Bajrami, kryetar i Komisionit Parlamentar për amendamentimin e Kushtetutës së vendit.

Duke folur për ndryshimet kushtetuese në pjesët ku ka të bëjë me zgjedhjen e presidentit të Republikës, Bajrami ka bërë të ditur se presidenti i ardhshëm duhet t’i revokojë të gjitha postet politike në parti, shkruan Koha Ditore.

Ndërsa për të kandiduar për këtë post ai duhet t’i mbledhë edhe 15 mijë nënshkrime sikur edhe kandidatët e tjerë të pavarur.

Ndërsa do të mund shkarkohet vetëm nga Gjykata Kushtetuese.

Deputeti Bajrami ka theksuar se mandati i presidentit do të jetë pesëvjeçar për shkak që të mos përkojë me përfundimin e mandatit të Kuvendit dhe të kryeministrit.

Ai është shprehur optimist se amendamentet e bëra do ta kenë përkrahjen e të gjitha partive parlamentare në Kuvendin e Kosovës, pasi që, sipas tij, ndryshimet kushtetuese në këtë çështje kanë qenë më se të nevojshme për t’i shmangur vakuumet politike në vend.

Për ta plotësuar punën e tyre, do të organizohen edhe debate publike me qytetarë me të cilat një ndër çështjet kryesore që do të diskutohet pritet të jetë shtetësia e dyfishtë e kandidatëve për president si dhe betimi.