Bota

201 milionë të papunë në gjithë botën

Sipas një raporti të ILO, në vitin 2019 pritet që në botë të ketë 212 milionë njerëz të papunë, që është numër për 11 milionë më i madh se numri aktual

Shkalla e papunësisë në nivel planetar po tregon një trend ngritjeje, trend i cili pritet të vazhdojë me po këtë ritëm edhe në vitet në vijim. Sipas një raporti të bërë nga Organizata Ndërkombëtare e Punës (ILO), në vitin 2019 pritet që në botë të ketë 212 milionë njerëz të papunë, që është numër për 11 milionë më i madh se numri aktual i të papunëve (201 milionë).

Që nga fillimi i krizës globale të vitit 2008 në gjithë botën janë shuar më shumë se 60 milionë vende pune, raporton ILO. Më së shumti janë prekur nga shuarja e vendeve të punës dhe nga papunësia në përgjithësi, të rinjtë e moshave 15 deri 24 vjeçare, shkruan srf.ch. Krahas rritjes së shkallës së papunësisë është rritur edhe pabarazia në paga, në të gjitha nivelet.

Sipas vlerësimit të organizatës së përmendur, kjo shkallë papunësie dhe pabarazie zbeh besimin në qeveritë e vendeve përkatëse. Dhe kjo fsheh në vete edhe rrezikun për trazira të mundshme sociale.