50 shqiptarët e parë fluturuan pa viza drejt Brukselit

Ministri Basha dhe 50 qytetarë shqiptarë u nisën sot drejt Brukselit, në ditën simbolike të liberalizimit të vizave për Shqipërinë

Ministri i Brendshëm, Lulzim Basha kryeson një grup prej 50 qytetarësh shqiptarë që u nisën të mërkurën të parët drejt Brukselit, në ditën simbolike të fillimit të liberalizimit të vizave për Shqipërinë.

Grupi, siç bëjnë të ditur mediet nga Tirana, do të pritet në takime të veçanta nga përfaqësues të lartë të Komisionit, Këshillit dhe Parlamentit Evropian, nga Drejtori për Ballkanin Perëndimor në Drejtorinë e Përgjithshme të Zgjerimit – Pierre Mirel, Shefi i Njësisë për Marrëdhëniet me Jashtë në Komisionin e Punëve të Brendshme – Luigi Soreca dhe një përfaqësues i presidencës belge të Bashkimit Evropian.

Ata do të vizitojnë gjithashtu Parlamentin Evropian dhe do të takohen me Komisionarin për Zgjerimin të Bashkimit Evropian – Stefan Fule, Kryetarin e Delegacionit për Ballkanin në Parlamentin Evropian – Eduard Kukan dhe eurodeputetet, Doris Pack e Tanja Fajon.

Presidenti i Parlamentit Evropian, Jerzy Buzek do të përshëndesë me një video-mesazh ndërsa të enjten, është takimi me Komisioneren për Çështjet e Brendshme, Cecilia Malmstrom.

Udhëtimi pa viza do të vazhdojë për në Romë ku është rezervuar një takim me ministrin e jashtëm italian Franco Frattini.

Grupi shqiptar do të vizitojë në Romë muzeun Capitolini dhe sallën e firmosjes së Traktatit të Romës.