Falsifikohen kartëmonedhat e reja 10 €

Me gjithë emetimet e reja me masa shtesë të sigurisë, u shfaqen bankënotat e para të falsifikuara të 10 eurove në serinë e re.

Policia italiane të hënën afër Napolit ka zbuluar një sasi të madhe të kartëmonedhave të falsifikuara të 10 eurove, të bëra nën emetimin e ri me mbrojtje shtesë të sigurisë që synon parandalimin e falsifikimit të monedhës së përbashkët evropiane.

“Ky është konfiskimi i parë i kartëmonedhave të falsifikuara të serisë së re në Evropë”, thuhet në deklaratën e policisë financiare italiane.

Napoli është i njohur si një qendër për monedha false.

Policia gjeti në makinën e një 39-vjeçari më shumë se 500.000 kartëmonedha të rreme euro.

“Kontrollet paraprake tregojnë se kartëmonedhat janë të cilësisë së shkëlqyer dhe lehtë mund ta mashtrojnë këdo që i pranon”, thuhet në deklaratën e policisë, përcjell albinfo.ch.

Banka Qendrore Evropiane, me futjen e kartëmonedhave të reja ka synuar të jetë një hap përpara nga falsifikatorët, sepse sipas tyre, përmbajnë një numër të përmirësimeve kur është fjala për masat shtesë të sigurisë.