Arben Markaj dhe tregimi i tij për Krishtlindjen

Besimtari katolik mjeshtëron, gëdhend dhe dekoron në objektin kompleks dhe që kërkon shumë punë, atë të «stallës», skenës së lindjes së Krishtit

Gjatë gjithë vitit, Arben Markaj baba i tre fëmijëve e ka vështirë të gjejë kohë për të shprehur kreativitetin e vet. Si udhëheqës filiale në një restorant ushqimi të shpejtë në Baden (Kantoni Aargau), ai ka shumë për të bërë edhe në kohën para Krishtlindjes, shkruan gazeta lokale «Rundschau». Por për diçka ai gjeti megjithatë kohë: në periudhën e Adventit besimtari katolik mjeshtëron, gëdhend dhe dekoron në objektin kompleks dhe që kërkon shumë punë, atë të «stallës», skenës së lindjes së Krishtit, transmeton albinfo.ch. Ajo e zë rreth një të katërtën e dhomës së tij të ndejës.

Gruaja e tij, Federika e thotë si me pëshpëritje se gjatë kësaj kohe i del ca më shumë punë për pastrim…

Shtalla me Jezuin e posalindur, Marinë, Jozefin, tre mbretërit, barinjtë, engjujt, kafshët dhe detajet e gdhendura me dashuri, përbëjnë jo vetëm për tri vajzat e tij një kryevepër të kohës së para Krishtlindjes. E gjithë lagja grumbullohet për të shikuar skenën, dhe për ta celebruar atë siç është zakon vende-vende me bekimin e pemës së Krishtlindjes, duke gostitur me kafe dhe ëmbëlsira.

Kosovari është i sigurt: Në «Alt-Rieden», lagjen ku jeton ai ndodhet një krishterim i jetuar, që siç e thotë ai «përbën një shembull të mirë për gjithë botën». Kështu, në atë lagje kopshtet, sheshet e lojërave të fëmijëve dhe bankat për ulje shfrytëzohen si një e mirë e përgjithshme. Kur dikush ulet në to, të tjerët me kënaqësi i afrohen, flasin për brengat e përditshme, për politikën, zotin dhe për botën. Kur përgatitet një skarë, secili e vendos aty edhe salsiqen e tij. Fëmijët luajnë rreth fontanës dhe nëpër kopshte, ashtu si në kohët e shkuara në vendet prej nga vijne ata si nga Kosova, nga Bavaria, Freiamti ose Fricktal etj. Të gjithë ndihmojnë dhe mbështesin njëri tjetrin kur paraqitet nevoja.

Dhe përse kjo do të duhej të quhej rrëfim i Krishtlindjes? Për arsyen se është pikërisht një përbashkësi e tillë që i kalon gjeneratat dhe nacionalitetet, kjo dashuri e afërsi e jetuar në praktikë, ajo çfarë ne kremtojmë në Krishtlindje, përfundon «Rundschau».