Gruevski dorëzohet, paralajmëron dorëheqje

Kryeministri i Maqedonisë, Nikolla Gruevski ka paralajmëruar dorëheqje të kushtëzuar nga posti i shefit të ekzekutivit. Dorëheqja do të jetë efektive 100 ditë para mbajtjes së zgjedhjeve

Nikolla Gruevski ka paralajmëruar dorëheqjen nga posti i kryeministrit të Maqedonisë, një post që e ka mbajtur nga vitit 2006. Ai ka thënë se dorëheqjen e “kushtëzuar” do ta dorëzojë të premten (nesër) para Parlamentit të Maqedonisë, ndërsa nga Qeveria do të largohet 100 ditë para mbajtjes së zgjedhjeve parlamentare.

“Nesër deri te kryetari i Parlamentit do ta dorëzoj letrën time për dorëheqje nga posti i kryeministrit të Qeverisë së Maqedonisë. Ajo do të jetë efektive 100 ditë para mbajtjes së zgjedhjeve të parakohshme parlamentare”, deklaroi Gruevski, citojnë mediat në Shkup.

Ai tha se me dorëzimin e dorëheqjes në Kuvend, plotëson obligimet e Marrëveshjes së Përzhinos, një marrëveshje që është arritur në korrik të vitit të kaluar nga katër liderët e partive politike në Maqedoni, dy maqedonase dhe dy shqiptare (VMRO-DPMNE, LSDM, BDI dhe PDSH).

“Sipas Marrëveshjes së Përzhinos kryeministri do të duhet të tërhiqet 100 ditë përpara zgjedhjeve, dhe unë që nesër deri të kryetari i Parlamentit të Maqedonisë do ta dorëzoj kërkesën për dorëheqje”, deklaroi Gruevski, i cili tha se dorëheqjen po e bën vetëm që Maqedonia të del nga kriza.

Ndryshe, Marrëveshja e Përzhinos “për dalje nga kriza politike në Maqedoni”, u ndërmjetësua nga Komisioneri për Zgjerim i Bashkimit Evropian, Jonahes Hahn. Sipas kësaj marrëveshje, zgjedhjet e parakohshme parlamentare do të mbahen më 24 prill të këtij viti, ndërsa kryeministri Gruevski do të japë dorëheqje në fund të vitit 2015.

Kryeministri në ikje, Gruevski tha se partia e tij, VMRO-DPMNE është subjekti më i konsoliduar në Maqedoni dhe paralajmëroi fitoren e radhës.