ISIS mund të kryejë sulme tjera në Evropë

Agjencia e Policisë e Bashkimit Europian, Europoli, ka publikuar një raport të ri, ku thuhet se grupi Shteti Islamik dhe militantë të tjerë mund të kryejnë sulme në shkallë të gjerë në Europë, pas atyre të Parisit

“Europa aktualisht po përballet me kërcënimin më të madh terrorist të këtyre 10 viteve të fundit”, thuhet në raportin e Europolit, përcjell VoA.

Drejtori i Agjencisë, Rob Wainwright, tha në një konferencë shtypi se “Shteti Islamik ka krijuar një kapacitet të ri për sulme terroriste në shkallë të gjerë në botë, me fokus të veçantë në Europë.”

Në raport thuhet se “sulmet do të drejtohen fillimisht ndaj objektivave të butë” për shkak të pasojave që ato sjellin.

Raporti i Europolit vjen ndërsa kjo agjenci po krijon Qendrën Europiane Kundër Terrorizmit, me seli në Hagë, transmeton albinfo.ch

Wainwright tha se në qendër do të punojnë 50 ekspertë kundër terrorizimit, të cilët do të merren me shkëmbimin e informacioneve, me zbulimin e luftëtarëve të huaj, të burimeve të financimeve, të armëve të paligjshme, si dhe për t’i ndihmuar vendet anëtare të BE-së në hetimet kundër terrorizmit.