Sebastian Kurz, nesër në Kosovë

Ministri i Jashtëm i Austrisë, Sebastian Kurz, të enjten do të qëndrojë në Kosovë, ku do të zhvillojë takime me liderët institucionalë vendës.

Kurz sot viziton Shqipërinë, ndërsa dje ka qëndruar në Beograd.

Gjatë takimeve me kryeministrin e Serbisë, Aleksandër Vuçiq dhe homologun e  tij serb, Ivica Daçiq, ministri i Jashtëm i Austrisë, Sebastian Kurz, u ka kërkuar atyre që Serbia të intensifikojë dialogun për përmirësimin e marrëdhënieve fqinjësore me Kosovën, si një nga kushtet për anëtarësimin e saj në BE.

Austria këto vizita të kryediplomatit të tyre i kishte paralajmëruar si fushatë për afrimin e mëtejshëm të vendeve të Ballkanit Perëndimor me BE-në, përfshirë Shqipërinë dhe Kosovën. Në nisje  të turneut në 6 vendet e rajonit, ministri i Jashtëm austriak, Sebastian Kurz, kishte thënë se axhenda e bisedimeve do të prekë si përpjekjet për zgjidhjen e valës së refugjatëve në kufirin Greqi-Maqedoni, ashtu dhe afrimin e vendeve të rajonit me BE-në.

Albinfo.ch