Komisioni për Politikë të Jashtme “i impresionuar” me Marty-n

Komisioni, ka mbështetur njëzëri raportin e Martyt dhe ka kërkuar që akuzat e ngritura të hetohen nga një komision ndërkombëtar

Raportuesi i Këshillit të Evropës, Dick Marty, i cili është dhe deputet i dhomës së ulët të Parlamentit Zviceran, i ka raportuar Komisionit për Politikë të Jashtme i Parlamentit të Zvicrës rreth raportit të tij shumë të përfolur mbi “trafikun me organe”.

Komisioni, i cili e ka mbështetur njëzëri raportin e Martyt, ka kërkuar që akuzat e ngritura prej tij, të hetohen nga një komision ndërkombëtar. Komisioni përmes një mocioni kërkon po ashtu nga Qeveria Federale që të angazhohet edhe në shkallë ndërkombëtare për hetimet në fjalë, thuhet në një komunikatë për medie, të komisionit. Pas informimit që bëri Marty mbi sfondin dhe rrjedhojat e raportit të tij, komisioni së bashku me ministren e jashtme Micheline Calmy-Rey i kanë peshuar mundësitë e Zvicrës për tu angazhuar për hetime ndërkombëtare.

Komunikata më tutje thekson se komisioni “është shumë i impresionuar nga puna e shkëlqyer” dhe nga “raportimi i balancuar” i Marty-t rreth këtij rasti kompleks. Po ashtu, komisioni ka lavdëruar Marty-n për “guximin dhe angazhimin” e tij personal. 

Ndërkaq, sipas asaj që shkruan blick.ch, anëtarët e komisionit kanë drejtuar kritika të ashpra në adresë të presidentes së vendit, njëherësh ministre e jashtme, Micheline Calmy Rey për “mos informimin” e tyre nga ajo rreth gjendjes në Kosovë.

“Anëtarët e komisionit kanë drejtuar kritika për mos informimin e tyre nga ministrja e jashtme Rey dhe nga Qeveria Federale rreth akuzave që kanë rënduar mbi Hashim Thaçin dhe politikanët tjerë me peshë të Kosovës, në kohën kur Zvicra ka njohur pavarësinë e shtetit të Kosovës.

Ky informim, sipas tyre, ka qenë i domosdoshëm kur dihet se qeveritë dhe shërbimet inteligjente të perëndimit kanë pasur prej vitesh njohuri lidhur me akuzat e rënda që u bëhen politikanëve kosovarë.

Komisioni për Politikë të Jashtme merret me shqyrtimin e çështjeve që kanë të bëjnë me qëndrimin e Zvicrës në raport me botën, me marrëdhëniet e saj me vende të ndryshme etj. Ai përbëhet nga 26 anëtarë. Kryesuese e komisionit aktualisht është Christa Markwalder, nga Partia Liberale (FDP).