Nis grumbullimi i Shqipërisë

Shqipëria, në grumbullimin e saj në Austri, do të zhvillojë 2 takime miqësore: me Ukrainën dhe Katarin

Shqipëria ka nisur zyrtarisht përgatitjet për Kampionatin Evropian “Francë 2016”. Kuqezinjtë janë grumbulluar Bad Waltersdorf të Austrisë, ku për dhjetë ditë do të përgatiten sa më mirë për Evropianin në Francë, që është i pari për Shqipërinë, shkruan albinfo.ch.

Trajneri Gianni De Biasi kishte në dispozicion 19 lojtarë në total në këtë seancë të parë stërvitore, përfshi dhe tre portierët, të cilët nisën menjëherë nga puna me trajnerin e tyre.

Seanca e parë stërvitore kishte një ngarkesë të lehtë fizike, me trajnerin De Biasi që në ditët e para do të përqendrohet më shumë në ç’tensionimin e muskujve të futbollistëve të tij, që kanë jo pak ngarkesë nga një sezon i gjatë.

Në pjesën e dytë të stërvitjes, trajneri ndau ekipin në dy grupe duke zhvilluar dhe një ndeshje kontrolli mes dy skuadrave. Përgjithësisht futbollistët u shfaqën të qeshur në këtë seancë të parë drejt Francës, që është dhe pjesëmarrja e parë e kuqezinjve në një kompeticion të rëndësishëm dhe qetësia dhe humori i mirë janë dy elementë që trajneri De Biasi do t’i kushtojë shumë rëndësi jo vetëm në stërvitje por dhe në grumbullim.

Shqipëria, në grumbullimin e saj në Austri, do të zhvillojë 2 takime miqësore: me Ukrainën dhe Katarin.

Këta janë futbollistët që do të jenë në grumbullim:

Portierë: Berisha, Hoxha, Shehi.

Mbrojtës: Ajeti, Aliji, Gjimishiti, Mavraj, Cana, Agolli, Rrahmani, Hysaj, Veseli.

Mesfushorë: Memushaj, Kaçe, Lila, Basha, Xhaka, Roshi, Kukeli, Lenjani, Shala, Abrashi.

Sulmues: Bala, Çikalleshi, Sadiku, Rashica, Gashi.