Këtë javë dihet formati i bisedimeve Prishtinë-Beograd

Shefi i delegacionit serb në bisedimet midis Prishtinës dhe Beogradit, Borko Stefanoviq, ka thënë sot se është shumë shpejt mund të fillojnë këto bisedime dhe se Beogradi zyrtar është i gatshëm. Sipas tij, brenda kësaj jave do të dihet se kur saktë do të fillojnë këto bisedime si dhe formati i tyre.

“BE-ja, pesë anëtare të së cilës, nuk e njohin pavarësinë e Kosovës, nuk e kundërshton këtë”, ka thënë Stefanoviq gjatë një tryeze të mbajtur në Beograd lidhur me bisedimet e ardhshme midis përfaqësuesve të Kosovës dhe Serbisë, që do të mbahen në Bruksel, me ndërmjetësim të BE-së.

Sipas Stefanoviqit, në fillim do të bisedohet rreth çështjeve të telekomunikacionit, kadastrës, komunikacionit ajror dhe çështjes të të zhdukurve, ndërsa lista përfundimtare e temave nuk është vërtetuar deri në fund dhe mund të zgjerohet.

Ndërsa, koordinatori i Qeverisë për veriun e Kosovës, Ylber Hysa ka thënë se bisedimet janë “shans për të gjithë”, por që Beogradi duhet të pranojë realitetin në Kosovë.

Zyrtarët e BE-së, kanë konfirmuar se janë në raundin përfundimtar të konsultimeve para fillimit të dialogut Prishtinë-Beograd. Ndërsa BE-ja dhe Prishtina insistojnë se do të diskutohet vetëm për çështje teknike, Beogradi zyrtar thotë se do të flitet edhe për statusin.

Ndërkohë, sot kryeparlamentari Jakup Krasniqi dhe anëtarët e Kryesisë së Kuvendit kanë thënë se negociatat me Serbinë, në asnjë formë, nuk bën të ndodhin pa kaluar nëpërmjet Kuvendit. Edhe partitë opozitare po kërkojnë që para fillimit të bisedimeve në Kuvend të hartohet platforma e Prishtinës për këto bisedime.