Vazhdoi dialogu i delegacioneve të Prishtinës dhe Beograd

Në këtë raund do të dialogohet për komunikacionin ajror, telekomunikacionit dhe vulat e doganave

　

Dialogu i filluar të mbrëmë në Bruksel, nën mbikëqyrje të BE, ka vazhduar sot me takimin e drejtpërdrejtë të përfaqësuesve të Prishtinës dhe Beogradit.

　

Sipas medieve serbe, pritet që ky raund i dialogut të zgjasë deri në orët e vona të pasditës, ndërsa do të dialogohet për komunikacionin ajror, telekomunikacionit dhe vulat e doganave.

　

Është paralajmëruar se pas takimit pritet që Zyra e përfaqësueses së lartë të BE-së për Politikë të Jashtme dhe Siguri, Catherine Ashton të dal me një kumtesë lidhur me dialogun e drejtpërdrejtë midis Prishtinës dhe Beogradit, ndërsa pritet që shefat e delegacioneve – Edita Tahiri dhe Borislav Stefanoviq të mbajnë konferenca për shtyp.

　

Sipas shefes së delegacionit të Kosovës, zëvendëskryeministres Edita Tahiri procesi i dialogut do ta përforcojë agjendën evropiane, si të Kosovës, ashtu edhe të Serbisë. Tahiri ka thënë pas takimit se kreativiteti mund t’u ndihmojë të dyja palëve për të përmirësuar jetën e njerëzve, por edhe për çuarjen përpara të agjendës evropiane të të dyja shteteve.

　

Shefi delegacionit serb, Borko Stefanoviq ka thënë se takimi i parë me delegacionin e Prishtinës ka qenë “normal dhe gjentil” dhe se ekipi nga Beogradi nuk ka lejuar kurrfarë “devijim të bisedimeve”, duke kaluar me efikasitet dallimet të cilat “pala tjetër shpesh ka tentuar t’i paraqesë”.

　

Në dialog, në emër të BE-së po merr pjesë Robert Cooper, ndërsa delegacionit tre anëtarësh të Washingtonin e udhëheq Thomas Countryman, zëvendësndihmëssekretar u Shtetit për Evropë dhe Evroazi.

　

Në takimet e delegacioneve që do të mbahen në vazhdim, pritet të diskutohen temat si çështja e të pagjeturve, doganat, sundimi i ligjit, liria e lëvizjes dhe bashkëpunimi rajonal, ndërsa analistët theksojnë rëndësinë që dialogu të mbetet në nivelin e çështjeve të tilla teknike.

　

---